Joomla Sport Template

Мерцедес како последен од „големите играчи“ во светот на Формула 1, денеска во барселона го претстави својот нов болид со кој Нико Розберг и Михаел Шумахер ќе се натпреваруваат во 2012 година.

Соопштено е дека возилото ги минало задолжителните тестови на ФИА уште во првата седмица на јануари, што оди во прилог на верувањето на конкурентите дека Мерцедес подготвува сензација, иако од таборот на екипата тоа го негираат. Болидот прв пат бил тестиран минатата недела на Силверстоун каде што биле извозени максималните 100 километри дозволени за таканаречените рекламни снимања, но бидејќи екипата во Херез тестираше само три од дозволените четири дена, сега имала можност пред промоцијата да направи приватен тест во Барселона, каде што возачите извозеле заедно 354 километри. Според соопштението на екипата, согласно со правилата, на болидот има две заначајни промени: спуштениот нос на болидот и позицијата на издувните цевки. Мерцедес тврди дека со работа на новата конструкција почнале во мај 2011 година, па заедно со засилувањата во техничкиот оддел (поранешниот технички директор на Ферари, Алдо Коста, им се приклучи како Шеф на одделот за дизајн во декември – з.а.), сега го продуцирале првиот заеднички болид во новата постава. Ланскиот болид бил составен од 4.300 делови, а овој има двесте повеќе, но според уверувањата од тимот, подобро е спакуван и ќе биде поефикасен, воедно постигнувајќи пониска тежина од претходниот.

- Верувам и се надевам дека W03 е возило на кое нашиот тим ќе биде горд, бидејќи ќе ни донесе резултати на патеката за кои сите напорно работеа за да се случат. И покрај дистинктивниот дизајн на носот, кој е секако за сладокусци, болидот претставува елегантна интерпретација на сегашните правила, а воедно прави јасен чекор напред во однос на својот претходник во смисла на дизајнот на деталите и софистицираноста. Лани произведовме похрабар болид, а неговите радикални елементи не секогаш ги испорачуваа резултатите на кои се надевавме, па стекнавме непроценлива искуство за дизајнот на возилото за оваа сезона. Болидот W03 е поинтегриран пакет, кој ги рефлектира нашите се секогаш силни врски меѓу Брекли и Бриксворт, а воедно демонстрира дека нашиот тим на „сребрени стрели“ го прави следниот чекор напред во смисла на перформанси на патеката,- вели Рос Браун во тимското соопштение.
- Направивме добар старт во нашата тест програма за 2012 година, па одлично е чувството да се направат првите кругови и со новиот болид. Возилото изгледа добро, мошне добро е спакувано и сите делови се во хармонија, што рефлектира колку добро соработуваат различните оддели во екипата. Од почетокот на возењето бевме во можност да се фокусираме на разбирањето на болидот и да направиме напредок со нашата тест програма. Ќе биде мошне интересно да се види каде припаѓаме во следните неколку седмици,- вели помладиот пилот, Нико Розберг.

- И покрај тоа што имам минато низ многу промоции и лансирања на нови болиди, сепак и после толку години, морам да кажам дека чувството е специјално. Деновите како овој се скапоцени моменти исполнети со надеж и очекување. Уште минатата седмица кога го возевме болидот прв пат (на Силверстоун – з.а.), тој веднаш ни даде добар фидбек и сензации. Почнувајќи од денес, ќе работиме интензивно за да направиме од него конкурентен тркач. Се разбира, во следните неколку седмици ќе видиме колку голем чеор сме направиле, но можам да ви кажам дека момците во фабриките во Брекли и Бриксворт беа брилијантни и вложија големи напори, па мораме да им заблагодариме. Знам каква награда тие би сакале, па ние дефинитивно ќе се обидеме да ја оствариме. Во мојот дел, јас сум желен да се борам повторно, нестрпливо ја очекувам новата сезона и едвај чекам да почнеме,- оптимистички изјави ветеранот Шумахер.
- Оваа сезона е трета за фабричката екипа на Мерцедес Бенз „сребрените стрели“, кои беа лансирани во 2010 година. Наша цел е да се подобриме на патеката. Многу труд беше вложен во текот на минатата година, не само во дизајнот на болидот, туку и во техничката организација која е способна да го испорача целокупниот потенцијал со конзистентност. Наша ултимативна цел е да станеме редовни победници во трките и да се бориме за титулата, да напишеме уште едно поглавје во успешната приказна на „сребрените стрели“ која започна пред 78 години. Наша цел оваа година е да направиме уште еден чекор напред на тој пат,- објасни Норберт Хауг, потпретседател на одделот за моторспорт на Мерцедес.

Заедно со болидот, на патеката Каталуња пред новинарите беше претставен и Мерцедес Бенз СЛ63 АМГ. Роудстерот кој има 537 коњски сили сега може да се пофали со намалена потрошувачка за 30%, како и заштеда од 125 килограми во тежината.